... (bielarusaczka) wrote in by,
...
bielarusaczka
by

  • Mood:

СЫТУАЦЫЯ Ў НАЦЫЯНАЛЬНЫМ ГУМАНІТАРНЫМ ЛІЦЭІ ІМЯ Я.КОЛАСА АБВАСТРЫЛАСЯ: ПРЫЙШЛА НОВАЯ ДЫРЭКТАРКА

Настаўнікі не жадаюць ёй падпарадкоўвацца, вучні зноў, як і пяць гадоў таму, гатовыя выйсьці бараніць ліцэй на вуліцу.

На загад міністра адукацыі Пятра Брыгадзіна на пасаду дырэктара ліцэя прызначана Тамара Шчэрбачэвіч. Яна наведала ліцэй і паведаміла, што з 29 траўня прыступіць да працы. На заўвагу, што яна не валодае беларускай мовай, Тамара Шчэрбачэвіч спаслалася на закон аб дзьвюхмоўі.

Дырэктару ліцэя Ўладзімеру Коласу дазволілі працаваць у якасьці намесьніка дырэктара. Вось, як ён сам пракамэнтаваў гэта для Радыё Свабода.

(Колас: ) “Я папярэдзіў кіраўніцтва міністэрства і заявіў гэтай асобе і пэдагагічнаму калектыву, што, калі, сапраўды, такім чынам будзе прызначаны чалавек на пасаду дырэктра і выконваць абавязкі ў кіраваньні ліцэем, як гэта ад пачатку заснаваньня рабіў я, то я са сваёй пасады сыходжу. Але тым ня менш, калі калектыў выкажыцца, што я задавальняю калектыў і выкажыцца, што жадае, каб я й надалей яго ўзначальваў, то я буду заставацца, пакуль гэта фізычна будзе магчыма, і буду выконваць гэтыя абавязкі”.

Новую дырэктарку не засмуціла нават і тое, што пэдагагічны калектыў выказаўся, што не жадае працаваць пад яе кіраўніцтвам. Бацькі ліцэістаў запрасілі Тамару Шчэрбачэвіч на свой бацькоўскі сход. Тая праігнаравала запрашэньне. Бацькі прынялі зварот у форме ўльтыматуму да дырэктаркі і ў Міністэрства адукацыі.


А 9-й раніцы ліцэісты, як звычайна, разыйшліся па аўдыторыях. Іхныя бацькі сабраліся ля будынку ліцэя. Яны абураліся паводзінамі новай, прызначанай міністрам адукацыі, дырэктаркі, якая і сёньня не пажадала паразмаўляць з бацькамі. Тамара Шчэрбачэвіч спаслалася на вялікую занятасьць. Бацькі непакояцца за будучыню ліцэя. Кожны год шмат ахвотнікаў аддаць сваіх дзяцей менавіта ў гэтую навучальную ўстанову.

Ліцэй імя Я.Коласа ўваходзіць у міжнародную фэдэрацыю ліцэяў “United World Colleges”, у якую ўваходзіць далёка ня кожны ліцэй з краіны Цэнтральнай і Ўсходняй Эўропы. Сяброўства ў гэтай сетцы дае права ліцэю штогод накіроўваць лепшага вучня на стажаваньня за мяжу. Выкладчыкі ліцэю амаль усе кандыдаты або дактары навук. Яны — аўтары значных мэтадычных працаў, падручнікаў, перакладаў мастацкай літаратуры, па якіх вучацца школьнікі ўсёй Беларусі. Напачатку 90-х ліцэй быў прызнаны пілётнай школаю для адпрацоўкі новых мэтодык у гуманітарных навуках.

Бацькі ліцэістаў маюць рашучы настрой, каб уратаваць ліцэй для сваіх дзяцей. У Вінцука Вячоркі ў ліцэі вучыцца сын Франак.

(Вячорка: ) “Спробы прыслаць сюды кіраўніка, які, мала таго, што невядомы ў мэтадычных колах, мала таго, што ня мае навуковай ступені, мала таго, што не валодае ніводнай замежнай мовай, дык яна й беларускай мовай не валодае! Гэта ёсьць абразай. Гэта ёсьць замахам на наш нацыянальны гонар!”

Да Вінцука Вячоркі далучыліся іншыя бацькі:

(Спадар: ) “Дзеці падтрымаюць нас, а мы іх. Трэба ж нешта рабіць. Пад ляжачы камень вада не цячэ”.

(Карэспандэнтка: ) “Вы пойдзеце разам зь дзецьмі, калі яны выйдуць на акцыю пратэсту?”

(Спадарыня: ) “Усе бацькі падтрымаюць сваіх дзяцей, калі дзеці выйдуць. А дзеці ў нас настроеныя больш радыкальна”.

Тым часам Тамара Шчэрбачэвіч прайшла ў пакой бугальтэрыі і зачынілася там.

Ліцэісты на кожным перапынку зьбіраліся ў актавай залі на сход. Аб 11-й гадзіне яны прынялі Зварот да дырэктаркі. У сваім Звароце вучні папрасілі новую дырэктарку сысьці ў адстаўку. У прыватнасьці яны напісалі, цытую, “лічым ганебным з вашага боку ацэньваць працу У.Коласа як нездавальняльную ці нядобрасумленную, як і ўсіх выкладчыкаў, хоць бы зыходзячы з вынікаў рэспубліканскіх і міжнародных прадметных алімпіядаў, дзе ліцэісты каторы год стала займаюць вышэйшыя месцы”. Мы прыйшлі вучыцца ў ліцэй таксама з-за беларускай мовы, якая тут заўжды панавала. На жаль, за Вашым прыходам мы ня бачым будучыні захаваньня гэткага ж нацыянальнага духу сярод ліцэістаў”.

Недзе праз гадзіну дырэктарка адчыніла дзьверы бугальтэрыі. Гэтым скарысталіся тры ліцэісткі. Яны папрасілі новую дырэктарку падняцца да іх у актавую залю і пазнаёміцца з вучнямі. Дырэктарка паведаміла, што ёй няма калі сустракацца, але, магчыма яна прыйдзе на наступным перапынку. Як толькі дзяўчынкі сышлі, спадарыня Шчэрбачэвіч сышла з ліцэю.

(Ліцэістка: ) “Прыйсьці і не зьвярнуцца да калектыву?! Калі бачна адносіны і настаўнікаў і нас?! Гэта папросту непрыстойна і непрыгожа. Зараз мы што можам, то й робім. Ліцэй наш і мы ліцэісты. Трэба, каб на гэта зьвярнулі ўвагу... А яна хаваецца...”

Ліцэісты прынялі рашэньне даслаць свой Зварот, як адкрыты ліст у Міністэрства адукацыі.

Лявон Баршчэўскі паведаміў, што многія выкладчыкі гатовыя сыйсьці з ліцэю.

(Баршчэўскі: ) “Я кваліфікаваных людзей у гэтай сфэры магу распазнаць па пяці фразах. Тут гэтых пяць фразаў я не пачуў ад гэтага чалавека. Нават блізка ў яе няма ўяўленьня пра ліцэй. Што тут, хто тут — ёй ніколі і ў галаву не прыходзіла. Яна шчыра нам заявіла на сходзе, што ніколі нічога пра ліцэй ня ведала. Адпаведным чынам я расцэньваю гэта — проста як зьнявагу для сябе. Такога начальніка над сабой я проста не пацярплю. Тут будзем або мы, або такія кіраўнікі, якія тут усё разваляць за 2-3 месяцы”.

Сёньня а 6-й гадзіне вечара ў ліцэі бацькоўскі сход. Туды запрасілі новую дырэктарку, але й гэтым разам тая праігнаравала запрашэньне. 30 траўня ліцэісты выйдуць на вулічную акцыю.

паводле Радыё Свабода

Ліцэйскі сайт
Паведамленьні можна пакідаць тут

Там жа і некаторая карысная інфармацыя для тых, хто жадае рэальна дапамагчы.
Subscribe
  • Post a new comment

    Error

    Anonymous comments are disabled in this journal

    default userpic

    Your reply will be screened

    Your IP address will be recorded 

  • 0 comments